நம்மைச் சுற்றி எல்லா நேரங்களிலும் மாற்றங்கள் தொடர்ந்து நிகழ்ந்து வருகின்றன. ஒரு பொருளின் இயற்பியல் பண்புகளில் ஏற்படும் மாற்றம் இயற்பியல் மாற்றம் எனவும், வேதிப்பண்புகளில் ஏற்படும் மாற்றம் வேதியியல் மாற்றம் எனவும் அழைக்கப்படுகிறது. இந்த அலகில் திண்மம், திரவம், வாயுக்களின் மீது வெப்பத்தின் விளைவுகளையும், நிலை மாற்றங்களையும், வேதியியல் மாற்றங்களையும் விரிவாக அறிவோம்.
1. இயற்பியல் மாற்றங்கள்
ஒரு பொருளின் வேதியியல் இயைபில் எந்தவொரு மாற்றத்தையும் நிகழ்த்தாமல், அப்பொருளின் இயற்பியல் பண்புகளில் மட்டுமே ஏற்படும் மாற்றங்களுக்கு இயற்பியல் மாற்றங்கள் என்று பெயர். இயற்பியல் மாற்றத்தில் புதிய பொருள் எதுவும் உருவாவதில்லை.
இயற்பியல் மாற்றத்தின் பண்புகள்:
- புதிய பொருள் எதுவும் உருவாவதில்லை.
- பொருளின் வேதியியல் இயைபில் எந்த மாற்றமும் நிகழ்வதில்லை.
- பொதுவாக தற்காலிகமானதும், மீள்தன்மை கொண்டதுமாகும்.
- பொருளின் வண்ணம், வடிவம், அளவுகளில் மாற்றம் நிகழலாம்.
எடுத்துக்காட்டுகள்: பனிக்கட்டி உருகுதல், நீர் கொதித்தல், காய்கறிகள் வெட்டுதல், தங்கம் உருக்குதல், இரப்பர் வளையம் நீட்டுதல்.