மனித உடலில் உள்ள திசுக்களால் ஆன ஒன்றிணைந்த உறுப்புகளின் கூட்டமைப்பே உறுப்பு மண்டலம் எனப்படும். உறுப்புகள் ஒருங்கிணைந்து ஒரு குறிப்பிட்ட பணியைச் செய்தலே உறுப்பு மண்டலம் ஆகும். நமது உடலில் எட்டு பிரதான உறுப்பு மண்டலங்கள் உள்ளன — எலும்பு மண்டலம், தசை மண்டலம், செரிமான மண்டலம், சுவாச மண்டலம், இரத்த ஓட்ட மண்டலம், நரம்பு மண்டலம், நாளமில்லாச் சுரப்பி மண்டலம் மற்றும் கழிவு நீக்க மண்டலம்.
6.1 எலும்பு மண்டலம்
எலும்பு மண்டலமானது எலும்புகள், குருத்தெலும்புகள் மற்றும் மூட்டுகளால் ஆக்கப்பட்டுள்ளது. மனிதனின் எலும்பு மண்டலம் 206 எலும்புகளை உடையது. இணைப்பு இழைகள் எலும்புகளை எலும்புகளுடன் இணைக்கின்றன; தசைநார்கள் எலும்புகளை தசைகளுடன் இணைக்கின்றன. எலும்பு மண்டலம் இரண்டு பிரிவுகளைக் கொண்டது — அச்சுச் சட்டகம் மற்றும் இணையுறுப்புச் சட்டகம்.
| அச்சுச் சட்டகம் | இணையுறுப்புச் சட்டகம் |
|---|---|
| மண்டையோடு | மார்பு வளையம் |
| முதுகெலும்புத் தொடர் (தண்டுவடம்) | இடுப்பு வளையம் |
| விலா எலும்புக் கூடு (12 இணை) | கை – கால் எலும்புகள் |