காற்று நம்மைச் சுற்றி எங்கும் நிறைந்துள்ளது. நம்மால் காற்றை பார்க்க இயலாது, ஆனால் காற்று இருப்பதை நாம் பல வழிகளில் உணர முடியும். மரங்களின் சலசலப்பு, கொடியில் போட்ட துணிகளின் அசைவு, வானத்தில் பறக்கும் பட்டம் போன்றவை மூலம் காற்றின் இருப்பை நாம் அறிந்து கொள்ளலாம். உணவில்லாமல் சில நாட்கள் வாழலாம், நீரில்லாமல் சில மணி நேரங்கள் வாழலாம். ஆனால் காற்றில்லாமல் சில நிமிடங்கள் கூட வாழ இயலாது.
காற்றின் இயைபு
காற்று ஒரே பொருளால் ஆனதல்ல; அது பல வாயுக்கள் அடங்கிய ஒரு கலவை. 1774ஆம் ஆண்டு ஜோசப் பிரிஸ்ட்லி என்பவர் காற்று ஒரு கலவை என்பதை சோதனை மூலம் நிரூபித்தார். காற்றின் பெரும்பகுதி நைட்ரஜன் வாயு ஆகும். காற்றில் ஐந்தில்-நான்கு பங்கு நைட்ரஜன் வாயு உள்ளது. காற்றின் இரண்டாவது பெரும்பங்கு ஆக்சிஜன் ஆகும்.
| காற்றின் கூறுகள் | சதவீதம் |
|---|---|
| நைட்ரஜன் | 78% |
| ஆக்சிஜன் | 21% |
| கார்பன்–டை–ஆக்சைடு, நீராவி, ஆர்கான், ஹீலியம் மற்றும் பிற வாயுக்கள் | 1% |