கணினி என்பது தரவு மற்றும் தகவல்களைத் தேவைக்கு ஏற்ப மாற்றியமைக்க உருவாக்கப்பட்ட ஒரு மின்னணு இயந்திரம். இதில் நாம் தரவுகளைச் சேமித்து வைக்கலாம். இத்தரவுகளை நமது தேவைக்கு ஏற்றவாறு தகவல்களாக மாற்றி எடுத்துக் கொள்ளலாம். இவ்வாறு பல விதங்களில் கணினி நமக்குப் பயன்படுகிறது.
கணினி பயன்படும் இடங்கள்
கணினி இன்று நம் வாழ்வின் எல்லா இடங்களிலும் காணப்படுகிறது. துணிக்கடை, தொடர்வண்டி நிலையம், வங்கி, ஏ.டி.எம், அஞ்சலகம், பள்ளி, அலுவலகம் என்று எங்கும் கணினி பயன்பாட்டில் உள்ளது. கணினிகள் பல வடிவங்களில் காணப்படுகின்றன — மேசைக் கணினி, மடிக்கணினி, கைக்கணினி, திறன்பேசி (Smartphone) என எல்லாமே கணினியின் வடிவங்களே ஆகும்.
கணினியின் வரலாறு
ஆரம்ப காலத்தில் கணினி என்று ஒன்று இல்லை. முதலில் அபாகஸ் (Abacus) என்ற கருவியைத்தான் கணக்கிடப் பயன்படுத்தினார்கள். பிறகு கணிப்பான் என்ற ஒரு சிறிய சாதனத்தைப் பயன்படுத்தினார்கள்.
19ஆம் நூற்றாண்டின் தொடக்கத்தில் கணிதப் பேராசிரியர் சார்லஸ் பாப்பேஜ் என்பவர் பகுப்பாய்வுப் பொறியை (Analogue Computer) வடிவமைத்தார். அவர்தான் 'கணினியின் தந்தை' எனவும் அழைக்கப்படுகிறார். அவர் ஏற்படுத்திய அடிப்படையான கட்டமைப்புதான் இன்றைக்கும் அனைத்துக் கணினிப் பயன்பாட்டிலும் உள்ளது.