நலம் என்பது ஒரு மனிதனின் முழுமையான உடல், மனம் மற்றும் சமூக நலனைக் குறிப்பதாகும். உலக சுகாதார நிறுவனம் (WHO) வரையறுத்தது போல், இது நோயின்றி இருப்பதை மட்டும் குறிப்பதல்ல. சுகாதாரம் என்பது நோயிலிருந்து பாதுகாத்துக் கொள்வதற்காகவும், நோய் பரவாமல் இருப்பதற்காகவும் நம்மையும் நமது சுற்றுப்புறத்தையும் தூய்மையாகப் பராமரிக்கும் செயல்முறையாகும். உடலின் உள் சமநிலையைப் பேணுகின்ற நிலை ஹோமியோஸ்டேசிஸ் எனப்படுகிறது.
6.1 உணவின் ஊட்டச்சத்துக்கள்
நமக்கு ஆற்றலைத் தருகின்ற, உடல் வளர்ச்சிக்கு உதவக்கூடிய மற்றும் நோய்களிலிருந்து நம்மைப் பாதுகாக்கக்கூடிய வேதியியல் கூறுகள் உணவில் காணப்படுகின்றன. அவையே ஊட்டச்சத்துகள் எனப்படுகின்றன. முக்கிய ஊட்டச்சத்துகள் ஆறு வகைப்படும்:
- கார்போஹைட்ரேட்டுகள் (மாவுச்சத்து)
- புரதங்கள்
- கொழுப்புகள்
- வைட்டமின்கள்
- தாது உப்புக்கள்
- நீர்
கார்போஹைட்ரேட்டுகள் (மாவுச்சத்து)
கார்போஹைட்ரேட்டுக்கள் ஆற்றல் தரும் உணவுக்கூறுகள் ஆகும். இவை மூன்று வகைகளாக வகைப்படுத்தப்படுகின்றன.