மொழிக் குறிகள்
மொழியாட்சியில் மொழிக் குறிகளும் எழுத்து, சொற்களைப் போன்றே பொருட்பொதிவுக்கும் வெளிப்பாட்டுக்கும் துணையாகின்றன. மொழித்திறனில் நிறுத்தற்குறிகள் பற்றி அறிவது இன்றியமையாதது.
விட்டிசைப்புக் குறிகள்
முறையான பொருள் வெளிப்பாட்டிற்காக வாக்கியப் பகுதிகளைப் பிரித்துக் காட்டவும் அவற்றை விட்டிசைந்து ஒலிக்கவும் எடுத்தாளப்படுகின்ற அடையாளங்கள் விட்டிசைப்புக் குறிகளாகும்.
முற்றுப்புள்ளி (.)
வாக்கிய முடிவைக் காட்டுவது முற்றுப்புள்ளி ஆகும். வாக்கியம் முடிவற்றது எனக்காட்ட அதன் இறுதி எழுத்தின் வலது கீழ் மூலையில் இடப்படும் புள்ளி இது. புள்ளியினை இடும் சூழல் நோக்கி 'முற்றுப்புள்ளி' சுருக்கக் குறியீடு என்றும் கொள்ளப்படும்.
முக்காற்புள்ளி (:)
':' என்பது முக்காற்புள்ளி. முக்காற்புள்ளி வரும் இடங்கள்:
- வாக்கியத்தில் கூறியதொன்றை விரித்துக் கூறும்போது முக்காற்புள்ளி இட வேண்டும்.
- முக்காற்புள்ளியுடன் ':-' என இடைக்கோடிட்டு எழுதலுமுண்டு — இக்குறியும் முக்காற்புள்ளியென்றே கொள்ளப்படும்.
அரைப்புள்ளி (;)
';' என்பது அரைப்புள்ளி. வாக்கியத்தில் ஒரு எழுவாய் பல பயனிலைகளைக் கொள்ளுமாயின் ஒவ்வொரு சொற்றொடர் நிறைவிலும் அரைப்புள்ளி இடப்படும். 'ஏனென்றால்', 'ஏனெனில்' போன்ற இணைப்புச் சொற்களுக்கு முன் அரைப்புள்ளி இடல் வேண்டும். அரைப்புள்ளியின் நிறுத்தல் கால அளவு அரை மாத்திரையாகக் கொள்ளலாம்.