புறநானூறு சங்க இலக்கியத்தின் எட்டுத்தொகை நூல்களுள் ஒன்று. தமிழரின் போர், வீரம், நாகரிகம், பண்பாடு, நெறிப்பட்ட வாழ்க்கை முதலியவற்றை விளக்கமாக எடுத்துரைக்கும் அரிய கருத்துக் கருவூலமாகத் திகழ்கிறது.
புறநானூறு — அறிமுகம்
புறம் + நான்கு + நூறு = புறநானூறு. புறத்திணை சார்ந்த நானூறு (400) பாடல்களைக் கொண்டது. இந்நூல் புறம், புறப்பாட்டு என்றும் வழங்கப்படுகிறது. அகவற்பாக்களால் ஆனது.
புறநானூற்றுப் பாடல்கள் சங்ககாலத்தில் ஆண்ட அரசர்களைப் பற்றியும் மக்களின் சமூக வாழ்க்கை பற்றியும் எடுத்துரைக்கின்றன. முடியுடை மூவேந்தர், குறுநில மன்னர், வேளிர் முதலிய சிறப்புடை மக்கள், போர்ச் செய்திகள், கையறுநிலை, நடுகல் போன்ற பல்வேறு பொருண்மைகளை வெளிப்படுத்தும் நூல் இது.
நூல் வெளி
இந்நூலை 1894ஆம் ஆண்டு உ.வே.சா. (உத்தமதானபுரம் வேங்கடசுப்பையர்) அச்சில் பதிப்பித்தார். இந்நூலின் சிறப்புக் கருதி பலரும் ஆங்கிலத்திலும் பிற மொழிகளிலும் மொழிபெயர்த்துள்ளனர்.
கலிபோர்னியா பல்கலைக்கழகத்தின் தமிழ்ப் பேராசிரியர் ஜார்ஜ். எல் ஹார்ட் (George L. Hart) The Four Hundred Songs of War and Wisdom: An Anthology of Poems from Classical Tamil, the Purananuru என்னும் தலைப்பில் 1999ஆம் ஆண்டு ஆங்கிலத்தில் மொழிபெயர்த்துள்ளார்.