முக்கூடற்பள்ளு

முக்கூடற்பள்ளு

நூல் அறிமுகம்

முக்கூடற்பள்ளு என்பது ஒரு சிற்றிலக்கிய நூல். இது "பள்ளு" என்னும் இலக்கிய வகையைச் சேர்ந்தது. நீர் நிறைந்த பள்ளமான சேற்று நிலத்தில் உழவுத்தொழில் செய்து வாழும் பாமர மக்களாகிய பள்ளர்களின் வாழ்க்கையை சித்திரித்துக் கூறுவதாக அமைந்த நூல், பள்ளு.

முக்கூடல் இடம்

திருநெல்வேலிக்கு சற்று வடகிழக்கில் தாம்பிரபரணி, சிற்றாறு, கோதண்டராம ஆறு ஆகிய மூன்று ஆறுகள் கூடும் இடத்திற்கு வடக்கே உள்ள சிற்றூர் முக்கூடல். இதற்கு ஆசூர் வடகரை நாடு என்னும் பெயரும் உண்டு. தெற்கே உள்ள பகுதி, சீவலமங்கைத் தென்கரை நாடு எனவும் வழங்கப்படுகிறது.

நூலின் பெயர்க் காரணம்

தென்கரை நாட்டில் மருதீசர் வீற்றிருக்கும் ஊர் மருதூர். முக்கூடலில் வாழும் பள்ளி மூத்த மனைவி, மருதூரில் வாழும் பள்ளி இளைய மனைவி — இருவரையும் மணந்து வாழும் ஒருவனின் வாழ்க்கை வளத்தை வடிவுரைப்பது போல் பாடப்பட்ட இந்நூல் முக்கூடற்பள்ளு என்று பெயர் பெற்றது.

ஆசிரியர் குறிப்பு

இந்நூலின் ஆசிரியர் யாரென்று தெரியவில்லை. ஆயினும், நாடக பாங்கில் அமைந்த இந்நூலை இயற்றியவர் என்னைனா புலவர் என சிலர் கூறுவர். சந்த நயம் அமைந்த பாக்களை கொண்ட இந்நூலில் திருநெல்வேலி மாவட்டப் பேச்சு வழக்கை ஆங்காங்கே காணலாம்.