மெய்பொருள் கல்வி என்னும் இப்பாடல் கவிஞர் வாணிதாசன் அவர்களால் இயற்றப்பட்டது. இது 'குழந்தை இலக்கியம்' என்னும் பாடல் தொகுப்பிலிருந்து எடுக்கப்பட்டது. ஒரு தாய் தன் மகளுக்கு கல்வியின் மதிப்பை எடுத்துரைக்கும் பாடலாக இது அமைந்துள்ளது.
பாடல் — மெய்பொருள் கல்வி
தலைசீவிப் பள்ளிக்கே ஓடு - நல்ல
தங்கப் பதுமையாம் தோழர்களோடு!
விலையில்லா மெய்பொருள் கல்வி! - அதை
விரும்பிப் படித்தால் அறிவுண்டாம் செல்வி!
அழுக்கில்லா ஆடையே மேன்மை! அதை
அணிவதாலல்லவோ உடற்குண்டாம் தூய்மை!
ஒழுங்கோடு நூல்களைத் தூக்கி - நில்லாது
ஓடி ஓடி பள்ளியை நோக்கி!
சின்னஞ் சிறுகுயில் போல - இசை
சிந்திச் சிரித்துச் செவ்விதழ் காட்டு!
பொன்னொத்த தோழர்களோடு - பள்ளி
போகும் வழியிலும் ஒற்றுமை காட்டு!
* கற்பிப்போர் கண்கொடுப்போரே! - அந்தக்
கணக்காயர் உரையினில் இருசெவி சேரே!
நற்பெயர் எடுத்திட வேண்டும்! - நாளும்
'நன்றாகப் படித்துநீ முன்னேற வேண்டும்!'*
பொருள் விளக்கம்
மகளே! குளித்துத் தலைசீவி, நல்ல துணிகளை அணிந்து, பாட நூல்களை ஏந்தி, அழகிமிகு தோழிகளோடு பள்ளிக்கு விரைந்து செல்வாயாக! பள்ளி செல்லும்போது உன் நண்பர்களோடு ஒற்றுமையாகச் சிரித்து பழகி மகிழ்வாயாக! உன் வாழ்க்கைக்குக் கல்வி தரும் ஆசிரியர்தம் சொற்கேட்டு நடப்பாயாக! உற்றுழியாகவும் உறுதுணையாகவும் விளங்குவதே கல்வி. அதுவே என்றும் உன்னோடு நிலைத்திருக்கும். அத்தகு கல்வியைக் கற்று வாழ்வில் முன்னேறிப் புகழ்பெறுவாயாக!