சார்பெழுத்துகளின் வகைகள்
முதலெழுத்துகள் - ஒரு அறிமுகம்
தமிழ் மொழியில் உயிர் எழுத்துகள் பன்னிரண்டும், மெய்யெழுத்துகள் பதினெட்டும் தனித்து இயங்கி முதன்மைபெற்று விளங்குவதால், அவற்றை முதலெழுத்துகள் என்கிறோம்.
வீட்டில் முதல் பொறுப்பாளர்கள் பெற்றோர்கள். அவர்கள் தாமே தனித்து இயங்குகிறார்கள். அதனைப்போலவே, உயிரெழுத்துகளும் மெய்யெழுத்துகளும் தனித்து இயங்கி முதன்மை பெறுகின்றன.
சார்பெழுத்துகள் என்றால் என்ன?
குழந்தைகள் தம் பெற்றோரைச் சார்ந்திருப்பதை போலவே, முதலெழுத்துகளைச் சார்ந்துவரும் எழுத்துகளை சார்பெழுத்துகள் என்கிறோம்.
எடுத்துக்காட்டு: "உடல்" என்ற சொல்லில் 'உ' என்பது உயிர் எழுத்து. 'ட', 'ல்' என்பன என்ன எழுத்துகள்?
- 'ட' — உயிர்மெய் எழுத்து (ட் + அ = ட)
- 'ல்' — மெய்யெழுத்து
ட் என்னும் மெய்யெழுத்தும், அ என்னும் உயிரெழுத்தும் சேர்ந்து, 'ட' என்னும் உயிர்மெய் எழுத்தாகப் பிறந்தது. இதனைப்போன்றே மற்ற உயிர்மெய் எழுத்துகளும் உயிரையும் மெய்யையும் சார்ந்து வரும்.
சார்பெழுத்துகளின் பத்து வகைகள்
சார்பெழுத்துகள் பத்து வகைப்படும். அவை:
- உயிர்மெய் — மெய்யுடன் உயிர் சேர்ந்து பிறக்கும் எழுத்துகள் (எ.கா: க, கா, கி...)
- ஆய்தம் — 'ஃ' என்னும் சிறப்பு எழுத்து
- உயிரளபெடை — உயிர் எழுத்துகள் இழுத்து ஒலிக்கும்போது பிறப்பவை
- ஒற்றளபெடை — மெய்யெழுத்துகள் இழுத்து ஒலிக்கும்போது பிறப்பவை
- குற்றியலிகரம் — இகரம் குறுகி ஒலிக்கும் நிலை
- குற்றியலுகரம் — உகரம் குறுகி ஒலிக்கும் நிலை
- ஐகாரக்குறுக்கம் — ஐகாரம் குறுகி ஒலிக்கும் நிலை
- ஔகாரக்குறுக்கம் — ஔகாரம் குறுகி ஒலிக்கும் நிலை
- மகரக்குறுக்கம் — மகரம் குறுகி ஒலிக்கும் நிலை
- ஆய்தக்குறுக்கம் — ஆய்தம் குறுகி ஒலிக்கும் நிலை