மரமும் பழைய குடையும்
பாடல்
பிஞ்சு கிடக்கும் பெருமழைக்குத் தாங்காது
மிஞ்ச அதனுள் வெயில்ஒழுகும் – தஞ்சம்என்றோர்
வேட்டதுஅருள் முத்துசுவா மித்துரைரா சேந்திராகேள்!
கோட்டுமரம் பீற்றல் குடை.
பாடல் வகை
இது ஒரு சிலேடைப்பாடல் ஆகும். சிலேடை என்பது ஒரு சொல்லோ, தொடரோ இருபொருள் தருமாறு பாடுவது. இதனை இரட்டுறமொழிதல் என்றும் கூறுவர் (இரண்டு + உற + மொழிதல்).
பாடல் பொருள்
அடைக்கலம் என்று வந்து அடைந்தவர் விரும்பியதனை அளிக்கும் மன்னனே (முத்துசாமித்துரை) கேட்பாயாக!
கிளைகளை உடைய மரம், இளம் காய்களை உடையதாக இருக்கும்; மிக்க மழை பெய்தால் தாங்காது விழும்; அதனிடையே அமைந்த இடைவெளி வழியாக வெயில் வரும்.
பழைய குடையானது, கிழிந்திருக்கும்; பெருமழையைத் தாங்காது; துளைகள் வழியாக வெயில் உள்ளே செல்லும். எனவே, இத்தகைய காரணங்களால், பீற்றல் குடை, மரத்துக்கு ஒப்பானதாகும்.
சொல்பொருள்
- கோட்டு மரம் – கிளைகளை உடைய மரம்
- பீற்றல் குடை – பிய்ந்த குடை (கிழிந்த குடை)
- பிஞ்சு – இளம் காய்
- தஞ்சம் – அடைக்கலம், புகலிடம்
- வேட்டது – விரும்பியது
- அருள் – கருணை, தயவு
- மிஞ்ச – மிகுதியாக