புறநானூறு
பாடல்
நாடாகு ஒன்றோ; காடாகு ஒன்றோ;
அவலாகு ஒன்றோ; மிசையாகு ஒன்றோ;
எவ்வழி நல்லவர் ஆடவர்
அவ்வழி நல்லை; வாழிய நிலனே!
— ஔவையார்
பொருள்
நிலமே! நீ நாடாக இருந்தால் என்ன? காடாக இருந்தால் என்ன? பள்ளமாக இருந்தால் என்ன? மேடாக இருந்தால் என்ன? எங்கே ஆண்கள் நல்லவர்களாக இருக்கிறார்களோ அங்கு நீயும் நல்லதாக இருக்கிறாய். நிலமே, நீ வாழ்க!
சொல்பொருள்
- ஒன்றோ – தொடரும் சொல் (நாடாக இருந்தால் என்ன அல்லது … எனத் தொடரும்)
- அவல் – பள்ளம்
- மிசை – மேடு
- ஆடவர் – ஆண்கள் (இங்கு மனிதர்களைப் பொதுவாகக் குறித்தது)
- நல்லை – நல்லதாக இருக்கிறாய்
- வாழிய நிலனே – நிலமே, நீ வாழ்க!
நூல் குறிப்பு
புறநானூறு = புறம் + நான்கு + நூறு. எட்டுத்தொகை நூல்களுள் ஒன்று புறநானூறு. இந்நூல், புலவர் பலர் இயற்றிய பாடல்களின் தொகுப்பு. எட்டுத்தொகையும் பத்துப்பாட்டும் சங்க நூல்களாம். சங்க இலக்கியம் ஈராயிரம் ஆண்டுகள் பழமை உடையது. தமிழர்களின் வரலாறு, பண்பாடு ஆகியவற்றை அறிய உதவும் நூலாகப் புறநானூறு திகழ்கிறது.